Një person në Rrogozhinë dhe një tjetër në Lushnje janë arrestuar nga policia me dyshimet për zjarrëvënie të qëllimshme.
Sipas policisë u arrestua shtetasi A. S., 44 vjeç, banues në Rrogozhinë, pasi ka djegur me zjarr një sipërfaqe toke dhe ka demtuar pjeserisht magazinën me prodhime bujqësore të shtetasit S.Ll.
Gjithashtu një person u arrestua nga policia e Lushnjës si autor i dyshuar për vënien zjarr të një sipërfaqe me ullinj në vendin e quajtur “Kodrat e Kalipasë”.
Gjithashtu procedohet në gjendje të lirë për shkak të moshës një shtetas 15-vjeçar i cili dogji me zjarr mbeturinat duke rrezikuar disa prona në fshatin Golem.
“Në vijim të punës hetimore për zbulimin dhe vënien përpara përgjegjësisë ligjore të autorëve të zjarrvënieve, specialistët për Hetimin e Krimeve në Komisariatin e Policisë Lushnjë arrestuan në flagrancë shtetasin R. D., banues në Dushk, Lushnjë, pasi duke djegur me zjarr disa ferra, zjarri i ka dalë jashtë kontrollit dhe është djegur një sipërfaqe me ullinj në vendin e quajtur “Kodrat e Kalipasë”.
Po nga këto struktura, u procedua penalisht në gjendje të lirë një shtetas 15-vjeçar nga Dushku, pasi në aksin rrugor Lushnjë-Rrogozhinë u kap në flagrancë nga shërbimet e Komisariatit të Policisë Lushnjë duke djegur disa mbeturina ku zjarri ka rrezikuar që të përhapej në pronat e fshatit Golem”, njoftoi policia.