Azem Dedej, kryepalak i Dajtit, i arrestuar tre ditë më parë pasi në këtë njësi administrative u gjetën bimë narkotike kanabis sativa është liruar nga burgu.
Gjykata e Tiranës caktoi ndaj tij masën e sigurisë ‘Detyrim paraqitje’.
Ndërsa ‘arrest me burg’ gjykata vendosi për 37-vjeçarin, Rexhep Halili, i cili do të vijojë të qëndrojë në burg të paktën deri në përfundim të hetimeve.
Fillimisht ndaj tyre prokuroria ngriti akuzat e “kultivimit të bimëve narkotike”, kryer në bashkëpunim si dhe ‘shpërdorim detyre’.
Sipas akuzës, këta dy persona në bashkëpunim me njëri-tjetrin kanë kultivuar bimë narkotike kanabis.
Ata u arrestuan pas një kontrolli të policisë në njësinë administrative Dajt, ku u konstatuan bimë narkotike të kundraligjshme.
Përpara gjykatës 52-vjeçari me detyrë kryeplak në Dajt ka mohuar akuzat.
Ai është shprehur se vazhdimisht ka kryer kontrolle në zonë dhe nuk ka konstatuar asnjëherë në zonë mbjellje të lëndës narkotike.
Sipas tij, nëse do haste një gjë të tillë patjetër që do të lajmëronte autoritetet. Për këtë kërkoi masë më të lehtë sigurie, kerkesë e cila u pranua nga gjykata.
Në malin e Dajtit, policia pas kontrolleve gjeti të mbjella 25 rrënjë lënde narkotike, e për këtë arsye u vunë në pranga nga blutë e kryeqytetit kryeplaku dhe 37 vjeçari.
Por, për Dedjan nuk janë gjetur prova që ai kishte dijeni për aktivitetin e paligjshëm dhe për këtë do hetohet në gjendje të lirë.
