Detaje të reja janë zbuluar në lidhje me ngjarjen e rëndë që ndodhi fundjavën e kaluar në Kamëz dhe mbetën të plagosur çifit Paluca. Preng dhe Antoneta Paluca u plagosën me armë zjarri në derë të shtëpisë së tyre sapo dilnin nga makina.
Kamerat e vendosura në katin e dytë të objektit pesë katësh ku jeton familja Paluca, kanë filmuar gjithë dinamikën e ngjarjes së ndodhur rreth orës 22:05, të datës 07 gusht. Mësohet se kanë qenë dy persona që kanë marrë pjesë në këtë atentat dhe kanë qenë duke lëvizur me një mjet me xhama të zinj kur kanë ndjekur nga pas makinën ku ndodhej çifti Paluca dhe vajza e tyre e mitur.
Ata po ktheheshin nga qyteti i Kamzës kur u qëlluan me armë zjarri, por fatmirësisht vajza e tyre 15-vjeçare nuk mori asnjë dëmtim përveç se u bë dëshmitare e kësaj e ngjarje të rëndë. Sapo Preng Paluca ka hapur derën e makinës, njëri prej autorëve, i ka vënë dorën te xhami i mjetit, ka nxjerrë armën e zjarrit tip pistoletë me silensiator. Aty ka ndeshur në rezistencën e 50-vjeçarit i cili është përpjekur ti largojë armën nga duart. Në këto momente konfrontimi, arma ështe shkrepur vetëm një herë, ku predha e ka kapur Prengën fillimisht në dorën e majtë, i ka përshkruar në brinjë po në të majtën, duke deportuar brenda organeve të brendshme të trupit.
E njëjta predhë që ka përshkruar trupin e 50 vjeçarit, ka kapur në këmbë edhe të shoqen Antonetën, e cila ka pësuar vetëm një gërvishtje, ndërsa e bija e cila ndodhej në sediljen e pasme, përveç përballjes me situatën dramatike, fatmirësisht nuk ka pësuar lëndime. Ndërkohë mësohet se njëri prej autorëve ka patur rolin e drejtuesit të mjetit dhe tjetri ka qenë ekzekutori. Ata kishin vendosur në kokë, maska plastike të ngjashme me lëkurën e trupit të njeriut dhe që shpesh grabitësit profesionist i përdorin në vjedhjen e bankave. Për këtë ka dyshime që ata të kenë qenë vrasës profesionist dhe të paguar, ndërsa janë treguar të kujdesshëm duke marrë nga vendngjarja edhe predhën e nxjerrë nga arma e krimit. Pas atentatit, ata janë larguar me shpejtësi nga vendi i ngjarjes./Faxnews
