Një 45-vjeçare greke u dënua nga Gjykata Penale e Athinës me 9.6 vjet burg për rrëmbimin e një të mituri nën moshën 14 vjeç.
Ngjarja për të cilën u dënua grekja kishte krijuar një situatë të firkshme për një 28-vjeçare shqiptare, e cila për disa orë përjetoi momente ankthi dhe dramatike me foshnjen e saj të porsalindur në maternitetin shtetëror në Athinë.
Gruaja greke, tashmë e dënuar, i ka rrëmbyer foshnjën shqiptares nga krevati gjatë natës, kur ajo dhe stafi i spitalit ishin duke fjetur.
Siç shkruan gazeta greke Protothema, rrëmbyesja ishte nënë e dy fëmijëve të tjerë të moshës 4 dhe 10 vjeç dhe kishte muaj që kishte ideuar planin se do të merrte një fëmijë nga materniteti dhe ta çonte në shtëpi.
Mediat raportojnë se gruaja që rrëmbeu foshnjen e kishte abortuar fëmijën e saj të tretë kur ishte dy muajshe shtatzanë, por e kishte të mbajtur të fshehtë për 7 muaj të tjerë.
Gjatë kësaj kohe, gruaja greke e kishte gënjyer bashkëshortin me analiza të rreme dhe në realizimin e qëllimit të saj e “ndihmoi” edhe trupi i shëndoshë.
Mediat greke shkruajnë se 28-vjeçarja me origjinë shqiptare, kishte sjellë në jetë fëmijën e saj të dytë në orën 10.30 të mëngjesit dhe mamitë i kishin sjellë pranë vajzën e porsalindur.
“Në orën 4.45 të mëngjesit, mamia kishte rënë në gjumë. Pak më vonë, një zhurmë e çuditshme e zgjoi atë. Ajo pa një hije në korridor dhe pa krevatin bosh pranë 28-vjeçares dhe konstatoi mungesën e fëmijës.
E panikosur, ajo bërtiti dhe doli në korridorin e maternitetit. Kur konfirmoi se një nga mamitë e tjera nuk e kishte marrë foshnjën për t’u kujdesur për të, ajo dha alarmin”, shkruan gazeta greke.
Mësohet se gjatë kësaj kohe, 45-vjeçarja kishte mbërritur në shtëpinë e saj dhe i kishte “prezantuar” bashkëshortit fëmijën si të tyren, me justifikimin se kishte lindur urgjentisht me operacion në spital dhe se kishte ikur prej aty se nuk donte të rrinte më.
Foshnja, pasi iu nënshtrua ekzaminimeve mjekësore dhe analizës së ADN-së u konfirmua se ishte fëmija i porsalindur i 28-vjeçares.
Ndërkohë Gjykata Administrative e Shkallës së Parë të Athinës dha 15,000 euro për secilin nga dy prindërit, si dëmshpërblim ndaj stresit dhe ankthit që iu krijua prindërve.
Spitali i maternitetit apeloi kundër vendimit të shkallës së parë, por Gjykata Administrative e Apelit e Athinës hodhi poshtë të gjitha pretendimet e tij si të pabazuara.
Gjykata vendosi se sjellja e paligjshme e stafit spitalor u shkaktoi prindërve të të porsalindurit “dhimbje dhe vuajtje mendore, ndjenja frike dhe pasigurie në lidhje me shëndetin dhe integritetin fizik të fëmijës së tyre vetëm disa orë, si dhe mundësinë për të mos parë ata kurrë, rrjedhimisht, nuk pësuan dëme morale, si rezultat i së cilës, në këtë rast, spitali-materniteti ishte i detyruar t’i kompensojë ato dhe përcaktoi shumën prej 15,000 euro si një kompensim i arsyeshëm monetar për dëmin moral të pësuar secili nga dy prindërit”.
