Policia e Vlorës arrestoi ditën e sotme shtetasit Serdjan Barjamaj, 34 vjeç, dhe Besmir Zotaj, 33 vjeç, të cilët u kapën në flagrancë teksa po kultivonin disa fidanë kanabis në zonën e pyllit të ‘Ujit të ftohtë’, në Vlorë.
Ka qenë monitorimi me dron ai që ka zbuluar aktivitetin kriminal të dy të rinjëve, ndërsa arrestimi u bë nga forcat operacionale.
Materialet në ngarkim të tyre u referuannë prokurorinë e Vlorës, për veprime të mëtejshme hetimore.
“Gjatë mbajtjes nën vëzhgim me dron nga shërbimet e Policisë është organizuar puna për kapjen e dy shtetasve, të cilët bazuar dhe në pamjet filmike të dronit, ishin duke kultivuar fidanë të dyshuar kanabis. Menjëherë është ndërhyrë nga forcat e Policisë, duke bërë të mundur kapjen dhe prangosjen e shtetasve S. B., 34 vjeç dhe B. Z., 33 vjeç, të dy banues në Vlorë.
Këta shtetas, në bashkëpunim me njeri-tjetrin, kanë kultivuar fidanë kanabis në një sipërfaqe të pyllëzuar në zonën e “Ujit të Ftohtë”, Vlorë.
Gjithashtu, gjatë kontrollit në banesën e shtetasit S. B., shërbimet e Policisë gjetën të kultivuara në kubikë fidanë të dyshuar cannabis sativa”, njoftoi Policia.
