Bashkëshorti i Angela Martinit, Dragos Savulescun u arrestua ditën e djeshme në Greqi nga autoritetet të cilat kanë nisur procedurat e ekstradimit drejt Rumanisë.
Mediat në Greqi raportuan se shkas për arrestimin e tij u bënë postimet e Angelas e cila ka treguar se ndodhej me pushime në Greqi, së bashku me Dragos.
Urdhri i arrestit për të u lëshua pas një urdhri evropian nga autoritetet rumune për pjesëmarrje në një grup kriminal (30 anëtarë), i cili përllogaritet ta ketë dëmtuar shtetin me 114 milionë euro përsa i përket disa pronave në Constatta dhe Mamaia.
Siç raportohet nga mediat rumune, bashkëshorti i Martinit ka mundur të sigurojë ilegalisht disa toka që gjendeshin nën pronësinë e një të moshuari, Ivonne Aline Buzescu-Movila. Së bashku me dikë tjetër, mbiemri i të cilit është Giurgiucanu, biznesmeni i ka marrë pronësitë falë ndihmës së një noteri. Më pas, këto toka u janë shitur të afërmve apo miqve me një çmim shumë të ulët.
Pas vendimit të autoriteteve gjyqësore për dënimin me burg, Savulescu u arratis në Itali, konkretisht në Napoli derisa u vu në pranga në Greqi.
Si u njoh miliarderi rumun me modelen shqiptare?
Angela ka zbuluar para disa kohësh se si lindi historia e dashurisë me biznesmenin rumun. Në një mini-intervistë në Instagram, ajo i është përgjigjur pyetjeve të ndjekësve duke zbuluar kështu shumë detaje.
“Ku dhe si jeni takuar me bashkëshortin”, e ka pyetur një fans modelen, ku kjo e fundit është përgjigjur: “U njohëm në një festë që po mbahej në shtëpinë e tij në Los Angeles, në kuzhinë, në të njëjtën shtëpi ku jetojmë bashkë sot. Kjo foto është bërë mbrëmjen që u takuam për herë të parë”.
“Çfarë ju bëri të dashuroheshit me bashkëshortin tuaj? Jeni çift perfekt”– e pyet dikush tjetër.
“Inteligjenca e tij, burrëria, sinqeriteti, besnikëria, bujariteti, mënyra sesi ai mendon, mënyra sesi ai dashuron, stili i tij, është shumë seksi si dhe mënyra sesi më puth edhe më më prek”, ka shkruar Angela.
