Kukulla gjigante përfaqëson një vajzë 9-vjeçare siriane që po ecën 8,000 kilometra nga Turqia në Angli.
Udhëtimi përfaqëson historitë e miliona refugjatëve të rinj, të cilët detyrohen të lënë shtëpitë e tyre dhe shpesh udhëtojnë vetëm, pa prindërit.
Pjesë e një projekti që synon ndërgjegjësimin për vështirësitë me të cilat përballen refugjatët fëmijë, kukulla gati 4 metra e gjatë do të kalojë kufirin e tetë vendeve. Ajo do të lëvizë nga Turqia në Greqi, pastaj në Itali, Francë, Zvicër, Gjermani, Belgjikë dhe në fund në Mbretërinë e Bashkuar, ku udhëtimi i Amalit të Vogël do të përfundojë në Mançester, më 3 nëntor.
Kukulla gjigante është bërë nga Kompania e Kukullave Handspring dhe janë dashur gjithsej katër animatorë për t’i dhënë jetë Amalit të Vogël: nga një për secilin krah, një për kurrizin e saj dhe një aktor brenda trupit të saj, duke ecur mbi këmbë dhe gjithashtu duke operuar një sistem kompleks telash që kontrollojnë shprehjet e fytyrës së kukullës.
Themeluesit e Handspring Puppet Company, Basil Jones dhe Adrian Kohler, edhe pse të dalë në pension, u anagazhuan për ta krijuar atë.
“Historia e refugjatëve është problemi më i madh i kohës sonë,” tha Kohler.
I quajtur “The Walk”, projekti ka sloganin: “Mos na harroni”.
“Kjo është bërë pikërisht sepse bota tani po shikon probleme të tjera, kështu që është kaq e rëndësishme që të rikthehet në fokus kriza e refugjatëve”, -është shprehur Amir Nizar Zuabi, drejtori artistik i “The Walk”.
Amali e Vogël bazohet në një personazh nga teatri Good Chance dhe prodhimi i tyre i quajtur The Jungle, një shfaqje për kampin e refugjatëve Calais në Francë. Në histori, Amal, nëntë vjeçe, është një refugjate siriane nga qyteti i Alepos, duke kërkuar nënën e saj.
Lufta civile siriane filloi zyrtarisht 10 vjet më parë, që atëherë familjet kanë vuajtur gjatë një konflikti brutal që ka copëtuar vendin. Rreth 6.8 milionë sirianë tani janë refugjatë ose azilkërkues dhe 6.7 milionë njerëz të tjerë janë detyruar të lënë shtëpitë e tyre dhe jetojnë në kushte të këqija brenda Sirisë.
Në secilin prej 70 qyteteve që Amal po viziton, do të ketë një festival muzikor dhe teatral në mbështetje të refugjatëve. I paguar nga një mbledhës fondesh në internet, projekti “The Walk” ka mbledhur tashmë më shumë se objektivi prej 30,000 £, i nevojshëm për ta bërë të mundur udhëtimin.
