Rritja e infektimeve me Covid-19 po shkakton shqetësim në shumë shtete ku autoritetet janë duke rivendosur disa masa kufizuese, sikundër përdorimi i certifikatave të shëndetit, të cilësuar edhe si një mjet për të nxitur vaksinimin.
Franca ka bërë thirrje për mjekë dhe infermierë vullnetarë për të ndihmuar në përballimin e situatës në territoret e Martinique dhe Guadeloupe, ku spitalet janë të mbingarkuar me të infektuar. Franca është përfshirë edhe nga protestat ku kundërshtohet certifikata e imunizimit, e detyrueshme për të marrë një sërë shërbimesh.
Në Itali autoritetet i tremben një vjeshte më të vështirë. Në 24 orët e fundit ne shtetin fqinj u regjistruan 5735 të infektuar dhe 11 viktima. Në fund të gushtit Sicilia dhe Sardenja rrezikojnë të kalojnë nga zona e bardhë në të verdhe.
Shtetet e Bashkuara të Amerikës vijojnë të raportojnë numrin më të lartë të të infektuarve në botë, e madje kjo situatë është cilësuar pandemia e të pa-vaksinuarve, duke u bërë thirrje që të injektohen sa më shumë qytetarë.
Totali i përgjithshëm i rasteve të konfirmuara të COVID-19 në SHBA nga e shtuna tejkaloi shifrën 35.73 milion, me 616.712, viktima.. Zhgënjimi dhe shqetësimi po rriten në të gjitha shtetet amerikane pasi rastet e reja të të prekurve, të nxitura nga varianti Delta, arritën një maksimum në më shumë se 100,000 raste në ditë. Rastet e COVID-19, shtrimet në spital dhe vdekjet vazhdojnë të rriten në shumicën e shteteve amerikane, veçanërisht në komunitetet me mbulim më të ulët të vaksinimit.
Situata është veçanërisht e rëndë në shtetet qendrore dhe jugore, përfshirë Florida, Teksas, Misuri, Arkansas, Luiziana, Alabama dhe Misisipi.
Presidenti Joe Biden kritikoi Guvernatorin e Floridas dhe guvernatorët e tjerë republikanë pasi nuk janë të detyrueshme maskat në shkollat publike dhe jo vetëm.
