Këngëtarja e famshme me origjinë shqiptare, Bebe Rexha, jeton në Los Angeles të Kalifornisë prej më shumë se 10 vitesh. Ajo është lindur e rritur në New York dhe shpesh viziton familjen e saj atje, përkatësisht prindërit, të cilët vazhdojnë të jetojnë në shtëpinë e tyre në Staten Island të New Yorkut.
Beba ka treguar së fundmi për US Weekly disa fakte interesante rreth saj, të cilat nuk i kemi ditur më parë.
Mes shumë fakteve të përmendura rreth vetes, ajo thotë se kur kthehet në New York te shtëpia e prindërve të saj, vazhdon ende të flejë në të njëjtën dhomë ku ka fjetur që e vogël.
Një fakt interesant që 31-vjeçarja e bëri të ditur për fansat është fakti se pavarësisht se është një milionere dhe shumë e ngarkuar me punë, ajo gjen kohë që në shtëpinë e saj luksoze në Los Angeles, të kultivojë një kopsht me perime.
“Unë kam një kopsht të madh me domate në oborrin tim. Babai im u rrit në një fermë në Maqedoni dhe më mësoi pak për kopshtarinë”, ka treguar Bebe Rexha për US Weekly.
Babai i këngëtares, Flamur Rexha, është rritur në Dibrën e Madhe të Maqedonisë së Veriut nga ku edhe familja e saj ka prejardhjen, gjersa nëna e saj, Bukurije Rexha, është me prejardhje nga Gostivari.
