Erion Veliaj, Kryebashkiak i Tiranës, duket se ka marrë rolin e një anëtari të Komitetit Teknik të Ekspertëve anti-Covid, ose Ministrisë së Shëndetësisë, për të mos thënë atë të Kryeministrit.
Gjatë një aktiviteti në Ndroq, ku i ka dorëzuar çelësat e një banese të rindërtuar një familjeje, Veliaj u shpreh se vaksinimi do jetë kusht për të marrë pjesë në aktivite, qofshin ndeshje futbolli apo sheshe.
Pra, Kryebashkiaku duket se ka marrë flamurin e vaksinimit me detyrim të qytetarëve, edhe pse zyrtarisht shefi i tij politik, Edi Rama, ka deklaruar se vaksinimi nuk do të jetë i detyrueshëm.
Por Veliaj mendon ndryshe dhe për këtë ai thotë se të pavaksinuarit nuk do të lejohen të marrin pjesë në stadiume, koncerte, kinema, anfiteatër apo edhe në sheshe.
“Doni të ndiqni një koncert, tregoni kartelën e vaksinimit, doni të shkoni në stadium, tregoni se jeni vaksniuar. Një përqind e atyre që s´duan të vaksinohen, nuk kanë pse të mbajnë peng qytetin”, u shpreh Veliaj.
Nuk dihet nëse ky mendim i shprehur nga Veliaj do të pranohet edhe nga Kryeministri Edi Rama apo Komiteti Teknik i Ekspertëve. Ajo që dihet është se në Shqipëri po aplikohen të paktën dy vaksina, Sivonak dhe Sputnik V, që kanë marrë një përdorim emergjence nga OBSH, por nuk janë çertifikuar nga EMA.
