Skandal në portin e Barit në Itali. Qytetarët shqiptarë të cilët kishin prerë biletat për t’u kthyer në vendlindje pranë familjeve të tyre dhe për të kaluar pushimet verore u është dashur të presin me orë të tëra. Në një video e cila ka mbërritur në redaksinë e Bold News, një nga qytetarët që presin, tregon radhët e gjata si dhe të makinave që duhet të hipin në target.
Të indinjuar nga ajo që kanë hequr, qytetari akuzon qeverinë Rama për neglizhencën ndaj tyre, për moskujdesin dhe për linjat e trageteve të cilat nuk respektojnë orarin.
“Shiko si e kanë lënë popullin. Ai Edvini, këtu në Bari. 24 orë me vonesë trageti. Ka njerëz që vijnë nga Milano me fëmijë të sëmurë. Shikoje popullin si qëndrojnë. Tallen me ne. Minishengen thotë ai. Të rregullojë linjat e trageteve, por tallen me ne, nuk ka qeveri. Nuk bëhet ky vend”, thotë qytetari në video i indinjuar nga pritja dhe nga pamja që shfaq.
Në video duken edhe plehrat e grumbulluara si pasojë e konsumimit të ushqimeve të qytetarëve në pritje të nisjes së tragetit.
Kjo nuk është hera e parë që qytetarët shqiptarë që jetojnë dhe punojnë jashtë vendit, përballen me vonesa të linjave të trageteve dhe të fluturimeve në Aeroportin Nënë Tereza.
