Ish-Kryeministri Sali Berisha ka hedhur poshtë çdo mundësi që në Parlamentin e ri të hyjë si deputet i pavarur, pra jo si pjesë e grupit parlaentar të PD.
Madje Berisha tha se ishte i gatshëm të bënte aleancë me çdo demokrat, dhe ti përgjigjej çdo nisme, që mund t´a largonte atë nga grupi parlamentar demokrat.
“Unë do hyj në Parlament ashtu sikundër më kanë mandatuar zgjedhësit, pra si deputet i PD-së. Jam i gatshëm të bëj aleancë me çdo demokrat, për t´iu përgjigjur çdo vendimi që bie ndesh me vullnetin e qytetarëve shqiptarë”, tha Berisha.
Ndërkohë ai u shpreh se ndoshta Ambasadorja amerikane Yuri Kim është mërzitur kur kam denoncuar marrëveshjen anti-Kushtetuese që favorizon Dalina Ficon lidhur me dosjet në Gjykatën e Lartë.
“Zëri im do të trefishohet në mbrojtje të interesit publik të shqiptarëve, në mbrojtje të të vërtetave dhe në mbrojtje të interesit kombëtar, kjo nuk mund të ndryshojë nga askush dhe cilido tjetër mbi tokë, nga asnjë lloj presioni”, tha Berisha.
Ai tha se kreu demokrat, Lulzim Basha, i ka kërkuar Ambasadores Kim, faktet dhe provat lidhur me vendimin për shpalljen “non grata” të Sali Berishës, bashkëshortes dhe dy fëmijëve të mi.
“Yuri Kim sillet si një Guvernatore, qoftë me marrëveshjet që inicon, qoftë edhe me ato që nënshkruhen, që janë në kundërshtim me Kushtetutën”, tha Berisha.
