Stadiumi i Skënderbeut sot ka qenë arena e një “miqësoreje” Superioreje, pasi aty janë përballur dy skuadra të elitës së futbollit shqiptar, Skënderbeu vendas dhe Dinamo e sapongjitur. Një sfidë që është mbyllur me shifrat 2-1 për blutë, të cilët vazhdojnë të tregojnë se ndonëse të ndërtuar nga e para, do të kenë shumë për të thënë në këtë sezon nën drejtimin e Bledi Shkëmbit.
Blutë shënuan të parët me anë të Ibraimit, pas një aksioni mjaft të shpejtë në krahun e majtë të nisur po nga vetë kapiteni i skuadrës kryeqytetase. Por vendasit u përgjigjën me një aksion thuajse të ngjashëm në pjesën e dytë, me finalizues Marën për të barazuar shifrat.
Megjithatë, barazia zgjati pak minuta pasi Samake çoi në 2-1 rezultatin pas një goditje nga këndi, duke shënuar golin që vulosi fitoren e skuadrës së tij pasi shifrat nuk ndryshuan më deri në fund.
