Banorët e Lumasit janë futur në një grevë urie këtë të martë, pasi përpjekjet e tyre për mbrojtjen e burimit të Sinecit kanë rënë në vesh të shurdhër, sipas tyre.
Banorët protestojnë prej mbi 3 muajsh dhe përplasjet me policinë kanë qenë të shpeshta. Banorët madje pretendojnë se janë dhunuar nga policia e shtetit.
Duke folur për Fax News, një nga banorët u shpreh se te shteti i ka humbur besimi, por kanë besim tashmë vetëm te Zoti dhe te SPAK.
“Ne jemi të vendosur për t’i shkuar deri në fund. Na ka humbur besimi komplet te shteti, drejtësia dhe të tërë. Kam hyrë vetëm me një besim: te Zoti dhe SPAK. I kemi thënë, ju lutem shumë, merreni me përparësi këtë ccështje. Përderisa jemi dhunuar nga policia e shtetit. I bëj thirrje SPAK, ta shikojë këtë sepse është tërësisht korruptive. Kjo është e njëanshme. Jemi të vendosur për të shkuar deri në fund. Dhunimi vjen me urdhër të Ardi Veliut”, tha një nga banorët.
Një tjetër banor i Lumasit që është futur në grevë kërkoi shkakrkimin e drejtorëve lokalë të policisë në Berat, por gjithashtu shkarkimin e Drejtorit të Përgjithshëm Ardi Veliu, që sipas tij është ai që jep urdhërat për dhunë ndaj tyre.
“Kjo është një zonë e mbrojtur. Na kanë marrë me shkelma gratë dhe familje tona. Kërkojmë largimin e drejtorit të policisë. Kërkesat ja drejtojmë kryeministrit dhe qeverisë. Kërkojmë vetëm drejtësi. E kemi dërguar dhe në SPAK këtë projekt. Pruishjen e kanioneve, prishjen e bimësisë. Projekti nuk zbatohet sipas rregullave, është ndryshuar disa herë. Bie ndesh me mbrojtjen e natyrës.
Ka 3 muaj e gjysëm q ë bëjmë protesta por kanë rënë në vesh të shurdhër. E bëjmë grevën që gjykata të bëjë drejtësi. Të respektohet ligji, jo dhunë. Sepse dhuna sjell dhunë. Dhunë, dhunë! Është e tëra e qëllimshme. Policia duhet të mbështesë protestën jo firmën Salillari.
Ne kemi ujë 24 orë në këtë zonë. Ne kërkojmë drejtësi. Të largohen drejtoret e policisë së qarkut dhe drejtori atje lart që jep urdhrat, Ardi Veliu”, tha grevisti.
Ditën e sotme banorët e Lumasit janë futur në grevë urie për mbrojtjen e burimit të Sinecit. Ata kanë katër kërkesa: Shkarkimin e drejtorit të Policisë Edmond Targaj; pezullimin e punimeve të ujësjellësit; pezullimin nga detyra të Ardi Veliut; dhe një takim me Kryeministrin Rama.
