Drejtorit të Agjencisë Kombëtare të Mbrojtjes Civile, Haki Çako, ka reaguar sot lidhur me atë çka u denoncua një ditë më parë se ai ndodhej me pushime, ndërkohë që vendi po përballet me situatën e zjarreve.
Një ditë më parë kreu i KLSH, Arben Shehu, u shpreh se një ekip auditi nga institucioni i tij, kishte kërkuar të bëjë një audit te Emergjencat Civile, por nuk ishin lejuar me arsyen se Drejtori ndodhet me pushime.
Akuza e Arben Shehut u mbështet edhe nga Presidenti Meta, i cili e quajti të patolerueshme sjelljen e Haki Çakos në këtë përiudhë të vështirë për vendin.
Por Çako në reagimin e tij theksoi se ai si çdo njeri tjetër ka nevojat e tij dhe është e vërtetë që ka pasur një rast familjar, por ai shtoi se ka qenë dhe është në krye të detyrës.
“Një pjesë e punonjësve të Policisë kanë qenë në terren. Ndjej shumë keqardhje për interpretimin. Kreu i KLSH nuk mund t’i bëjë thirrje Drejtorit. Aq më tepër kur mund të kesh një event familjar, siç e kam pasur. Kjo s’do të thotë se nuk kam qenë në detyrë.
Nuk është e vërtetë që jam me pushime deri në datë 9 gusht. I gjithë personeli i agjencisë ka qenë në detyrë dhe do te jete ne detyrë. Edhe unë si të gjithë qytetarët mund të kenë një nevojë. Edhe e pata një event familjar. E rëndësishme se KLSH nuk është penguar asnjëherë për të vepruar. Unë jam te zyra. S’ka asgjë për të fshehur. Ka një organizim masiv të gjitha strukturave. Nuk është vetëm vendi ynë. I gjithë Ballkani është përfshirë nga temperatura të larta. Gjithkush duhet t’i dalë zot vetes”, tha Haki Çako.
Në fakt, vartësit e Çakos ishin ata që i kanë pohuar ekipit të KLSH se drejtori është me pushime dhe se auditi nuk mund të realizohej. Tani ose vartësit e Çakos kanë gënjyer ekipin e KLSH, ose ata janë gënjyer nga vetë kreu i Emergjencave Civile.
