Policia e Lezhës ka sekuestruar 2 mina me telekomandë, një thikë dhe një sasi parash.
Në pranga ka rënë poseduesi i tyre. Goditja e veprimtarisë kriminale të prodhimit dhe shitjes së minave me telekomandë erdhi pas një hetimi 3-javor.
“Në kuadër të hetimit, në Fushë-Milot, u organizua dhe finalizua operacioni i koduar “Miloti”, si rezultat i të cilit u bë e mundur kapja dhe arrestimi në flagrancë i shtetasit Besnik Osmanaj, 38 vjeç, banues në Sukth, Durrës” njofton policia.
Gjatë kontrollit të ushtruar nga Policia, në çantën e shtetasit Besnik Osmanaj janë gjetur dhe sekuestruar në cilësinë e provës materiale 2 mina me telekomandë të lidhura me aparat celular, një thikë që plotëson kushtet e armës së ftohtë, 1000 euro dhe aparate celularë.
Strukturat hetimore të DVP Lezhë, nën drejtimin e Prokurorisë së Rrethit Gjyqësor Kurbin, po vijojnë veprimet hetimore për identifikimin dhe kapjen e personave të tjerë të përfshirë në këtë veprimtari kriminale.
Materialet i kaluan Prokurorisë së Rrethit Gjyqësor Kurbin, për veprën penale “Mbajtja pa leje dhe prodhimi i armëve, armëve shpërthyese dhe municionit”, njoftoi policia.
