Vijon situata problematike në Vlorë për shkak të zjarreve. Karaburuni është në flakë prej tre ditësh, ndërsa një vatër e re është shfaqur dhe në Radhimë.
Drejtori i zjarrfikëses në Vlorë, Kastriot Begaj deklaron se për të përballuar situatën mungojnë burimet njerëzore dhe se po rrezikohet edhe jeta e zjarrfikësve. Sipas tij, e vetmja mënyrë për të ndalur përhapjen e flakëve është ndërhyrja nga ajri.
“Aktualisht në Karaburun po punojnë forcat e ushtrisë dhe punonjësit e zonave të mbrojtura. Edhe pse është terreni i vështirë ata po punojmë me mish e shpirt. Për të fikur këto zjarre duhet dhe mbështetje. Kemi nevojë dhe për ndërhyrjen nga ajri. Kemi rrezikuar dhe jetën e zjarrfikësve pasi gurë dhe shkëmbinj janë shkëputur për shkak të zjarrit. Nuk kemi mjaftueshëm zjarrfikës”, u shpreh Begaj për gazetarët.
