Detaje të reja kanë dalë në dritë në lidhje me vrasjen e 47-vjeçarit Ylber Lezi nga gruaja e tij Mine Lezi dhe bija e tij Aida Lezi. Kujtojmë se ditën e djeshme Gjykata e Rrethit Gjyqësor Mat vendosi masën e sigurisë burg pa afat për 51-vjeçaren dhe vajzën e saj, 21-vjeçare, por dy gratë nuk do të qëndrojnë në qelitë e paraburgimit, pasi do të dërgohen në një institucion shëndetësor për kurim të detyruar deri në momentin që ekspertiza mjeko-ligjore të shprehet rreth gjendjes së tyre mendore.
Gjatë seancës gratë ishin dukshëm në gjendje të rënduar psikologjike. Ndërkohë, gjatë marrjes në pyetje nga oficerët e Policisë Gjyqësore, Mine Lezi ka pranuar se bashkë me vajzën e kanë goditur kryefamiljarin në kushtet e vetëmbrojtjes. Raportohet se gjatë rrëfimit të ngjarjes, Mine Lezi e ka pranuar krimin, madje ka kujtuar edhe momentet e fundit të jetës së bashkëshortit.
Më konkretisht, 51-vjeçarja që vrau burrin është shprehur:
Ylberi erdhi në shtëpi i dehur totalisht. Filloi të fyente e godiste me grushte mua dhe vajzën. U munduam ta qetësonim dhe ta ndalonim, por ishte e pamundur. Bërtitëm fort që të vinin komshinjtë për ndihmë. Pastaj mori një dru dhe donte të na godiste. Ia morëm drurin dhe e goditëm. Nuk deshëm ta vrisnim. Më vonë vajzën e zuri gjumi dhe unë qëndrova në shtëpi. Afër mesnatës erdhi Policia.
Kujtojmë se ngjarja tragjike në familjen Lezi ndodhi natën e së dielës. Nënë e bijë qëlluan me sende të forta në pjesën e kokës kryefamiljarin Ylber Lezi, i cili konsumonte në vazhdimësi pije alkoolike. Ngjarja ka ndodhur rreth orës 22:00, kohë kur në polici ka mbërritur një telefonatë nga kryetari i fshatit. Pas afro gjysmë ore, Forcat e Rendit kanë mbërritur në vendin e ngjarjes dhe pas kontaktimeve me kryeplakun i janë afruar banesës.
Efektivët e Policisë dhe kryeplaku kanë thirrur me zë të lartë emrat e pjesëtarëve të familjes, pasi i janë ofruar kullës së vjetër dykatëshe në gjendje tejet të amortizuar. Duke e ditur se kryefamiljari ishte një person problematik dhe përdorues alkooli, ndërsa kishte ushtruar herë pas here dhunë mbi gruan dhe vajzën, është vendosur që Forcat e Rendit të hyjnë forcërisht në banesë. Zbulimi i trupit të 47-vjeçarit i ka befasuar efektivët e Policisë së Matit.
“Koka e të ndjerit ishte goditur disa herë me një dru. Dysheku ishte mbuluar me gjak”,-bënë me dije burimet policore.
Menjëherë, Policia ka kryer arrestimin në flagrancë të Mine dhe Aida Lezit. Pas kësaj, trupi i pajetë i 47-vjeçarit është dërguar në morgun e spitalit “Xhavit Mara”, ku i është nënshtruar ekspertizës mjeko-ligjore. Pas krimit të rëndë, dy femrat e familjes u arrestuan nga policia si të akuzuara për vrasjen brenda familjes.
