Zv.ministrja e Shëndetësisë, Eugena Tomini, iu drejtua me një apel qytetarëve, për të mos nënvlerësuar shenjat që mund të kenë si rrufë apo dhimbje koke, pasi mund të jenë prekur nga varianti Delta i Covid-19.
Tomini thotë që në çdo rast ata që shfaqin shenja t´i drejtohen mjekut të familjes, pasi është ky i fundit që mund të përcaktojë nëse personi po kalon një virozë të stinës apo është prekur nga Covid.
“Në rastin kur kemi shenjat klinike, rrufë, dhimbje kokë, grricje fyti, diarre, temperaturë. Ndërkohë këto janë disa shenja që e specifikojë si një infeksion viral të zakonshëm, nuk duhet që të nënvlerësohet asnjë rast por duhet të kërkohet ndihma e mjekut të familjes”, ka thënë ajo.
Në gusht “Delta” sipas Organizatës Botërore të Shëndetësisë pritet të dominojë në të gjithë botën, përjashtim nuk bën as Shqipëria.
Tomini i bën thirrje qytetarëve të vaksinohen me dy dozat antiCovid, të mbajnë maska në mjedise të mbyllura dhe të shmangin grumbullimet.
“Delta është një variant shumë i transmetueshëm që ka prekur dhe persona që janë të vaksinuar, por e kalojnë më lehtë. Jemi të rriskuar por vaksinimi vetëm pa zbatimin e masave nuk mund të kuptohet dhe në mënyrë të ndërsjelltë”, është shprehur.
Varianti Delta u konfirmua zyrtarisht nga autoritetet shqiptare vetëm 3 ditë më parë, edhe pse ka pasur dyshime se ai ka qarkulluar në vendin tonë prej disa javësh.
