Një foto e Ambasadores amerikane, Yuri Kim, me zyrtarët e Qeverisë, është shfaqur në rrjetet sociale. Diplomatja amerikane është shfaqur në krah të ministrave Elisa Spiropali dhe Niko Peleshi.
Ndaj fotos nuk ka kursyer ironinë aktivisti Genc Sejko, i njohur ndryshe si njeriu i memeve. Sejko në postimin e tij në rrjet i kujton diplomates Kim se kush janë Niko Peleshi dhe Elisa Spiropali, duke u shprehur se ata sot duhej të përballeshin me drejtësinë.
“Sipas raportit të Kontrollit të Lartë të Shtetit, zonja që ke në krah, zonja ambasadore, i ka shkaktuar të paktën 5 milion euro dëm dikasterit që dikur drejtonte.
Zotëria që ke përballë u shkarkua si ministër për paaftësi. Kjo sepse nuk deshën ta fusnin në burg për lejimin e shitjes së pesticideve të rrezikshme.
Njerëzve u vjen për të qeshur kur gjatë ditës deklaroni se mbështesni reformën në drejtësi, e gjatë natës harboheni me ata që duhet të ishin subjekt i saj.
Ndize edhe një tjetër, Kimete! E paske filluar me paketë?!,” shkruan Sejko.
