Tronditet Shkumbini, italiani Alesandro Borrela është larguar nga posti i presidentit të klubit, duke e lënë skuadrën pa burime financiare për sezonin e ri. Ky lajm i konfirmuar nga drejtuesit për “Panorama Sport”, ka sjellë padyshim një prej situatave më kaotike që ka përjetuar ekipi në sezonet e fundit, ku militoi në Kategorinë e Dytë.
Në vitin e kaluar biznesmeni Borrela ishte bërë aksionari i klubit me 75% të aksioneve, por mesa duket, kjo nuk e ka penguar atë që të largohet nga peqinasit, teksa nuk dihet qartë arsyeja e “divorcit” mes tij dhe klubit. Kjo është padyshim një goditje e madhe, jo vetëm për klubin që shpresonte shumë në mbështetjen financiare të presidentit italian, por gjithashtu edhe për realizimin e planeve që kishte thurur stafi teknik për të ndërtuar një skuadër konkurruese dhe me pretendime të mëdha.
Madje largimi i presidentit ka ndikuar direkt edhe në pezullimin e fazës përgatitore, që ishte planifikuar për të startuar ditën e hënë në ambientet e stadiumit të Peqinit, ku kanë qenë të pranishëm vetëm disa lojtarë vendës.
