Fatbardh Kadilli, i cili garoi për postin e Kreut të PD-së, përballë Lulzim Bashës, Edith Harxhit dhe Agron Shehajt, ka ironizuar sot kreun demokrat Basha, gjatë punimeve të Kuvendit Kombëtar të kësaj partie.
Gjatë fjalës së Kadillit, Basha nuk ishte i pranishëm në sallën e Pallatit të Kongreseve, aty ku demokratët kanë zgjedhur të zhvillojnë mbledhjen e Kuvendit Kombëtar.
Mungesën e Bashës në sallë, Kadilli e ka ironizuar kur tha se shpresonte që ai të mos ketë pasur nevojë për gjumë por për reflektim.
“Do kisha kënaqësinë të ishte këtu në sallë edhe në fjalimin e dikujt që nuk është në listën e recitimeve, të kryetarit.
Uroj që të mos ketë pasur nevojë për gjumë, por të reflektojë. Çdo delegat është këtu për një përgjegjësi më të madhe se vetja”, tha Kadilli.
Në zgjedhjet për kreun e PD, Kadilli mori më pak se 1000 vota, bazuar shifrave zyrtare të publikuara nga Partia Demokratike.
