Sulmuesi i Partizanit, Stenio Junior, bëri një ndeshje të shkëlqyer kundër Sfintulit, duke qenë protagonist absolut në të pestë golat që u dhanë fitoren “demave të kuq” kundër Sfintulit.
Në një intervistë ekskluzive për “Panorama Sport”, Junior foli për fitoren e madhe, paraqitjen e tij individuale, partneritetin me bashkëkombësin Lucas Cardozo, si dhe për sezonin në vazhdimësi, ku u shpreh se do të bëjnë të pamundurën që të tregojnë përgjatë gjithë kampionatit atë që treguan kundër Sfintulit.
Stenio, urime për ndeshjen e shkëlqyer. Si do ta përshkruanit performancën tuaj?
Ishte një natë e veçantë për mua dhe për të gjithë ekipin. Paraqitjet e mira si kjo kundër Sfintulit, janë ato që i duhen skuadrës për të qenë të motivuar për sezonin në vazhdim.
Ju shënuat dy dhe asistuat tre gola të tjerë. A është kjo ndeshja më e mirë në karrierën tuaj?
Gjithçka është pasojë e punës dhe përqendrimit. Kundër Sfintulit u përpoqa të bëja më të mirën për ekipin dhe kjo është ajo që do të kërkoj për sa kohë që do të vesh këtë fanellë. Kjo nuk ishte ndeshja ime më e mirë, por mund të them se është pjesë e më të mirave.
Kishit disa kombinime fantastike me Kardozon në sulm. A do të jetë ky një partneritet i frikshëm këtë sezon?
Ne duhet të punojmë shumë për të mbajtur një raport të mirë në sulm, jo vetëm me Kardozon, por me këdo që është pjesë e ofensivës. Shpresoj që thjesht të fitojmë më shumë besim dhe t’i bëjmë gjërat në mënyrën më të mirë të mundshme.
A mund të themi që Partizani është tashmë i kualifikuar?
Jo, kush ndjek futbollin, e di se gjithçka mund të ndodhë. Ne kemi edhe 90 minuta të tjera për të luftuar për qëllimin tonë. Jemi një ekip që kemi cilësi, ne e tregojmë në fushë dhe do të shkojmë në Moldavi duke e ditur se nuk do të jetë një ndeshje e lehtë.
A do të jetë Partizani kaq i fortë gjatë gjithë sezonit dhe të luftojë për të gjithë trofetë?
Ky është një synim që duhet ndjekur, pa dyshim, por duhet të përmirësohemi për të qëndruar të fokusuar në një sezon shumë të gjatë si ky që na pret.
Sa gola do të shënoni këtë sezon, keni një objektiv personal?
Nuk mund të them se sa gola do të shënoj, por mund të them se do të punoj sa më mirë që gjërat që unë bëj ta ndihmojnë ekipin dhe të shënoj gola gjithashtu.
Si ndiheni kur luani para tifozëve pas gjithë kësaj kohe?
Ishte një ndjenjë e mirë, të kesh mbështetjen e tifozëve është gjithmonë pozitive. Ne luajmë me motivim shtesë dhe falë tifozëve e mbështetjes së tyre, bëmë lojën kundër Sfintulit.
A mund ta fitojë Partizani edhe ndeshjen e dytë?
Po, ne kemi cilësi dhe do ta fitojmë ndeshjen. Duhet të mbajmë ritmin, pavarësisht nga rezultati i lojës së parë.
