Italia është kampionia e Europës. Skuadra e drejtuar nga Roberto Mancini fiton me penallti një finale dramatike në “Wembley” ndaj Anglisë.
Pjesa e parë nisi rrufeshëm dhe që në minutën e dytë, Anglia zë në befasi Italinë me një gol të Shaw i cili krejtësisht i lire pas një krosi në zone, shtyn topin në rrrjetë.
Anglia duket më mirë e vendosur dhe qarkullon topin, ndihen të çliruar edhe falë golit të shpejtë dhe në disa raste të tjera shfaqen rrezikshëm sidomos nga krahët.
Në minutën e 36’ vjen rasti i parë konkret për Italinë që shfaqet rrezikshëm me Chiesan me një gjuajtje nga jashtë zone dhe topi shkon pranë shtyllës.
Pjesa e parë mbyllet me kaq teksa fraksioni i dytë i ndeshjes rikthen një Itali tjetër në fushë. Edhe pse jo menjëherë e rrezikshme, të kaltërit janë më të rrezikshëm dhe japin menjëherë sinjale. Insigne fillimisht në 50’ me një gjuajtje vë në provë Pickford ndërsa Mancini bën menjëherë dy zëvendësime duke hequr një Immobile në hije dhe Barellan e në vend të tyre, Berardi me Cristante.
Në 62’, Pickford i mohon golin Italisë ku pas një gjuajtje fantastike të Chiesës, e devijon me majën e gishtave topin që po shkonte në rrjetë teksa në 68’ nuk mund të bënte asgjë kur në një korne Verratti godet shtyllën dhe topi i kthyer në këmbët e Bonuccit i cili nuk gabon dhe barazon 1-1.
Goli tashmë vë në vështirësi Anglinë që nuk është ajo e pjesës së parë dhe Berardi sërish në 74’ mund të përmbyste rezultatin me një top në zone që për pak i ikën nga këmbët.
Janë minuta të mira për skuadrën e Mancinit që tashmë dominon me lojë dhe mund të përftojë por humbet Chiesën për shkak dëmtimi në 87’. Minutat nuk mjaftojnë dhe finalja shkon në shtesë, ashtu si gjysmëfinalet e këtij Europiani.
Në minutën e 98’ është Anglia që rrezikon e para me një gjuajtje të Phillips me topin që shkon afër portës dhe në 104’, Italia i përgjigjet me një rast flagrant kur Emerson hedh një top nga e majta e as Belotti e as Bernardeschi nuk arrijnë ta shtyjnë topin në rrjetë.
Gjithsesi, pjesa e dytë e shtesave ka më pak emocione pasi skuadrat tregohen të kujdesshme dhe në fund vendosin penalltitë.
Berardi e Kane shënuan në të dy krahët fillimisht, teksa Belotti u ndal nga Pickford.
Më pas Maguire shënoi për Anglinë dhe e kaloi në avantazh, teksa as Bonucci në krahun tjetër nuk gaboi. Këtë e bëri Rashford dhe më pas Bernardeschi shënoi dhe Sancho gaboi çuditërisht, me Donnarumman hero për Italinë.
Sërish Jorginho për të vendosur gjithçka dhe sërish i njëjti njeri, në të njëjtën portë, por këtë herë historia ishte ndryshe. Ai gaboi, por gaboi edhe Bukayo Saka dhe Europiani shkoi në Romë.
