Emiljano Musta ishte një nga pesë lojtarët që debutuan pardje me fanellën e Partizanit, në ndeshjen kundër Sfintulit, por debutimi i anësorit të majtë nuk shkoi dhe aq mirë.
Në minutën e 44-t, pak para përfundimit të pjesës së parë, 29-vjeçari mori një goditje në gju, pas një dueli të fortë në mesfushë me një nga lojtarët e ekipit moldav.
Musta mbeti i dëmtuar në kupën e gjurit dhe u desh menjëherë ndihma e mjekëve. Musta e kishte të pamundur për të vazhduar më pas ndeshjen dhe në gjurin e tij vendosi akull.
Ditën e djeshme, mbrojtësi ka kryer dhe ekzaminimet e nevojshme për të mësuar shkallën e dëmtimit, ndërsa trajneri Ilir Daja ditën e sotme do të mësojë dhe përgjigjen nga stafi mjekësor sa i takon titullarit të tij. Në rast se ka ndonjë dëmtim të rëndë, Musta do të ishte një mungesë e rëndësishme në vazhdim.
