Interpol, në bashkëpunim me homologët në Belgjikë, kanë bërë të mundur arrestimin e Pëllumb Muskaj, 48-vjeçarit shqiptar i cili 28 vite më parë, qëlloi për vdekje një shtetas. Ai u dënua për 16- vite burg, por në vitin 1997 u arratis nga burgu. Shtetasi ekstradohet nga Belgjika.
Ky shtetas ishte shpallur në kërkim ndërkombëtar, pasi Gjykata e Rrethit Vlorë e ka dënuar me 16 vjet burg, për veprën penale “Vrasja me dashje”, pasi më datë 15.01.1993, në një lokal në Orikum, Vlorë, Pëllumb Muskaj ka debatuar me shtetasin G. H., pasi ky i fundit akuzohej se i kishte vjedhur një shumë parash shokut të tij, shtetasit S.M.
Shtetasi G. H. ka refuzuar t’ia japë lekët dhe Pëllumb Muskaj e ka qëlluar me kallashnikov, duke i shkaktuar vdekjen e menjëhershme.
Më datë 19.01.1993, Pëllumb Muskaj është arrestuar dhe në vitin 1997 është arratisur nga burgu i Lushnjës.
