Dy ditë para finales së EURO 2020, ekipi italian është disi i shqetësuar, pasi 3 gazetarë të atashuar pranë qendrës stërvitore të Kombëtares në Coverciano kanë rezultuar pozitivë me Covid-19.
Të tre pjesëtarët e medias, një gazetar dhe dy teknikë i përkasin trupës televizive të Rai dhe ishin pjesë e delegacionit që udhëtoi në Londër për ndeshjen me Spanjën.
Zyrtarët e federatës kanë marrë masa për të izoluar të gjithë qendrën, ndërsa skuadra i është nënshtruar testeve të shpejta për t’u siguruar që asnjë prej futbollistëve apo stafit teknik nuk është infektuar.
Në Federatën Italiane të Futbollit është krijuar një situatë shqetësuese pasi aktualisht Kombëtarja nuk po ushtron aktivitetin stërvitor në kushte normale.
Si masë parandaluese seancat stërvitore të skuadrës do të mbahen pa praninë e mediave.
Gjithsesi, kombëtarja Italiane dhe stafi teknik janë të gjithë të vaksinuar.
