Teuta nuk ia doli dje t’i bënte ballë Sheriff Tiraspol dhe u mund me shifrat 0-4 në “Niko Dovana”, duke i dhënë lamtumirë Champions League ende pa u luajtur ndeshja e dytë.
Pas ndeshjes për mediet foli trajneri i durrsakëve, Edi Martini, i cili tregoi shkakun përse skuadra e kishte aq të vështirë dhe shprehet se tashmë kualifikimi në raundin e dytë është i pamundur.
“Golin e parë e pësuam herët, që në minutën e 15-të dhe kjo solli edhe prishjen e ekuilibrave në fushë. Normalisht deri në ato minuta ishim të kujdesshëm, por pësimi i atij goli ndryshoi rrjedhën e lojës.
Pësuam gola që edhe mund të evitoheshin dhe të bënim më mirë. Megjithatë, dihet forca e kundërshtarit, Sherifi është një ekip mjaft i mirë dhe i shpejtë. Ata kanë përgatitje të lartë fizike, plus që e kanë kapur formën pasi e kanë nisur kampionatin në Moldavi.
Kishim planifikuar të luanim pak më lart, megjithatë kundërshtari na mori metra në fushë duke na zbritur poshtë. Kjo vjen nga cilësia e ekipit të Sherifit. Seferi luajti mjaft mirë, por e thashë që kundërshtari na mori mesin e fushës duke krijuar superioritet numerik në këtë repart.
Ata ishin më mirë fizikisht dhe duke na marrë mesin e fushës, kontrolluan lojën. Teuta e eliminuar? Normalisht po, pasi janë katër gola, gjë që e bën të pamundur përmbysjen në ndeshjen e kthimit në Moldavi. Gjithsesi, ne do ta respektojmë garën edhe në ndeshjen e kthimit”, u shpreh Martini.
