Kryeministri Edi Rama dhe Presidenti serb Aleksandar Vuçiç shpesh janë shigjetuar lidhur me mini-Shengenin, ndërsa kjo është cilësuar një projekt që mbështetet nga Soros.
Deri më tani nismës së mini-Shengenit i është bashkuar edhe Zoran Zaev, Kryeministri i Maqedonisë së Veriut, ndërsa pothuajse në çdo takim që është mbajtur, në kuadrin e këtij projekti, është shfaqur edhe Aleks Soros.
Kryeministri Edi Rama është shfaqur si mbrojtësi i këtij projekti në Shqipëri, madje duke ushtruar presion deri diku edhe ndaj politikanëve shqiptarë në Kosovë, që ti bashkohen idesë. Në anën tjetër, Kryeministri Albin Kurti e ka kundërshtuar idenë, ashtu sikundër edhe paraardhësit e tij në postin qeveritar, pavarësisht presioneve dhe deklaratave publike të Ramës.
Së fundmi, Presidenti i Serbisë, Aleksandër Vuçiç ka deklaruar se dëshiron marrëdhëniet më të mira të mundshme në rajon.
“Unë u përpoqa dhe bëra më të mirën time me Ana Bërnabiçin, Ivica Daçiçin Nikola Selakoviçin, për t’u përpjekur të kemi marrëdhënie sa më të mira në rajon. Ideja e ‘Mini-Shengenit’, ne e kuptojmë njëri-tjetrin shumë mirë “, tha Vuçiç për Tv Happy.
Presidenti serb gjithashtu përmendi shembuj të turistëve që vizitojnë vendet fqinje.
“Shoh se kjo ide i shqetëson shumë në Evropë, sepse ata nuk mund të menaxhojnë më, ne i marrim vendimet tona,” thotë Vuçiç.
Kreu i shtetit serb beson se ideja e bashkëpunimit rajonal është shumë e rëndësishme për popujt e Ballkanit.
“Ne, popujt ballkanikë, kemi qenë shënjestra për të minuar fuqitë e mëdha. Ballkani u përket popujve ballkanikë”, shtoi ai.
