Juristi Ledio Braho e konsideroi si një ogur të mirë operacionin e finalizuar sot në Lushnje, që çoi në arrestimin e Kryebashkiakut të Lushnjes, Fatos Tushe.
Por Braho tha se nga SPAK priten veprime mbi dosje të nxehta, si ato të mega-aferave të korrupsionit të denoncuara. Në këtë kuadër, Braho përmendi aferën e Unazës së Re apo edhe çështje të tjera që kanë të bëjnë me “peshqit e mëdhenj”.
“Me peshqit e mëdhenj nuk kam parasysh ministra apo ish-ministra, por ato që konsiderohen çështjet e nxehta”, tha Braho.
Sipas tij, nuk mund të priten arrestime të bujshme nga SPAK në fillimin e punës së tij, por tani është koha që pritet që ky institucion duhet të veprojë.
“Ndoshta tani do të shohim edhe produketet e para të reformës në drejtësi. Jam optimist se do të hetohen edhe aferat ku janë përfshirë peshqit e mëdhenj të politikës shqiptare”, tha Braho në një intervistë për Report TV.
Lidhur me çështjet e nxehta ai përmendi atë të Unazës, Teatrit Kombëtar, apo edhe kallëzimet e bëra nga opozita apo nga shoqëria civile.
“Janë denoncime lidhur me shit-blerjen e votave që janë kompetencë e SPAK dhe janë mjaft të rëndësishme”, tha Braho. Sipas tij, tani që edhe BKH është bërë funksionale, mund të ketë veprime mbi dosjet e bujshme.
“Shpresoj që nivelet e hetimeve mos mbeten te shoqëruesit, por të shkojnë te “peshqit e mëdhenj”. Uroj që të ketë persona të penduar, që të ketë prova, në mënyrë që këtyre çështjeve t´i shkohet deri në fund”, tha Braho.
