Detaje të reja kanë dalë në dritë në lidhje me vrasjen e 20-vjeçares në Greqi që u vra në sy të foshnjës së saj nga burri i vet. Ngjarja e rëndë vazhdon të jetë në qendër të mediave greke jo më për autorësinë, por mbi motivin, teksa hipotezat janë të shumta, ndërsa piloti vrasës ndodhet pas hekurave.
Janis Halvaxis, pronari i kompanisë ajrore në të cilën punonte piloti në një intervistë për mediat greke ka thënë se Babis ishte i ftohtë dhe narcist.
“Babis ishte gjithmonë pak i largët dhe i ndrojtur. Karakter i sjellshëm, por edhe i mbyllur. Ai ishte një pilot i mirë, por edhe pak narcist. Diçka që është disi normale kur je pilot në një moshë kaq të re”-tha Janis duke kaluar më pas te lidhja me Carolinën.
“Ne e kishim parë Carolinën dhe na bëri përshtypje mosha e saj (e mitur) dhe marrëdhënia e tyre. Ai nuk na tregoi sa vjeç ishte, por dukej sikur ajo ishte një vajzë e vogël”.
Ndër të tjera, ai tha se lajmi për vrasjen e Caroline dhe faktit që ishte Babis autor i ra si një “bombë”.
“Gjëja e fundit që më shkonte në mendje ishte që Babis do të vriste një njeri. Në fakt, ai i donte shumë edhe kafshët. Më bëri përshtypje që ai vrau edhe qenin”-tha pronari i kompanisë ajrore.
Nuk e linte kurrë vetëm
Në vitin 2019, kur Caroline mbaroi shkollën, shkoi tek Babis në Athinë për të jetuar me të. Nuk kaloi shumë kohë dhe ajo gjeti fustanin e saj të dasmës dhe çifti vazhdoi me procedurat.
“Caroline kishte parë një nga fustanet e mia në internet dhe më telefonoi për të caktuar një takim. Ajo erdhi e vendosur, e donte. Unë i bëra vellon asaj dhe bëmë disa modifikime shumë të vogla”, kujton pronarja e dyqanit të fustaneve Marianna Kioulani.
Në fakt, pronarja kujton që Babis dëshironte të ishte me të vazhdimisht dhe nuk donte ta linte vetëm as në provën e fustanit të nusërisë. Raportohet se Caroline i kishte treguar zonjës Kiolani se dasma do të bëhej në Portugali duke theksuar se dëshironte ta jetonte atë si një përrallë.
E detyruan të ndalonte Kickboxing
Në lidhje me talentin e Caroline për artet marciale ka folur trajneri i saj i cili ka thënë se 20-vjeçarja ishte një vajzë e talentuar, ndërsa theksoi se ajo ishte nën presion nga të tjerët për të ndaluar sportin në fjalë, duke nënkuptuar Babis si përgjegjës.
“Caroline ishte një sportiste shumë e mirë, mbase më e mira që ka kaluar nga kjo shkollë. Ajo ishte një vajzë mrekulli, një talent unik, që fatkeqësisht ndaloi Kickboxing jo sepse ajo dëshironte, por sepse atë e detyruan. Ne si shkollë u munduam që ta bindim për të mos ndaluar kickboxing dhe i thoshim që është e vogël dhe se kishte diferencë të madhe moshe me Babis, por nuk mundëm t’i ndryshojmë mëndje.”-tha trajneri i saj.
