Këshilli i Lartë i Prokurorisë është mbledhur online dhe ka vendosur pezullimin nga detyra të dy prokurorëve të arrestuar së fundmi për korrupsion, Edmond Karriqi dhe Maksim Sota.
Me 10 vota pro (në mungesë të anëtares Esmeralda Keshi), KLP pezulloi këtë të Hënë nga detyra prokurorët Karriqi dhe Sota për shkak të masës së sigurisë personale respektivisht “arrest me burg” dhe “arrest në shtëpi” vendosur nga Gjykata e Posaçme Kundër Korrupsionit dhe Krimit të Organizuar.
Pezullimi zgjat deri në rënien e shkakut për të cilin është vendosur, sikundër kundër këtij vendimi mund të bëhet ankim në Gjykatën Administrative të Apelit, sqaruan burime zyrtare pranë KLP.
Sipas akuzës, Karriqi dyshohet se ka kërkuar dhe ka marrë përfitime monetare të parregullta, me qëllim për të favorizuar disa persona nën hetim.
Ndërsa Sota, i vënë në pranga në kuadër të operacionit “Shpirti”, akuzohet se ndihmonte drejtuesin e një grupi kriminal.
“Për shkak të pezullimit nga detyra të prokurorit Edmond Karriqi, prokuror në Prokurorinë pranë Gjykatës së Shkallës së Parë Lushnje, i caktuar përkohësisht si Drejtues në Prokurorinë pranë Gjykatës së Shkallës së Parë Kukës, Këshilli vendosi transferimin përkohësisht me pëlqimin e tij, të Xhevahir Litës, prokuror në Prokurorinë pranë Gjykatës së Shkallës së Parë Tiranë, në Prokurorinë pranë Gjykatës së Shkallës së Parë Kukës, i cili do të ushtrojë detyrën si prokuror në Prokurorinë pranë Gjykatës së Shkallës së Parë Kukës, përkohësisht nga data 05.07.2021 – 04.01.2022. Gjithashtu, me propozim të Komisionit të Zhvillimit të Karrierës, Këshilli vendosi me votë unanime, që prokurori Xhevahir Lita të caktohet përkohësisht të ushtrojë edhe funksionin e Drejtuesit të Prokurorisë pranë Gjykatës së Shkallës së Parë Kukës, për një afat tremujor, nga data 05.07.2021 – 04.10.2021, pasi ai i plotëson kushtet e përcaktuara në ligj dhe në Rregulloren përkatëse të Këshillit”, sqaron KLP.
