Banorët e Lagjes “Partizani” në qytetin e Vlorës ankohen për mungesën e ujit të pijshëm. Ata shprehen të lodhur nga kjo situatë dhe nuk po gjejnë zgjidhje pavarësisht ankesave të herë pas hershme në institucione.
Depozitat majë çatisë tregojnë se në çezma nuk rrjedh ujë.
Për banorët e lagjes “Partizani” në Vlorë mbetet hall pa zgjidhje.
“Nuk na sheh njeri fare, ne duam ujë. Mbushim ujë atje poshtë. Ta sjellin ujin se e paguajmë ashtu si dritat.”
Thonë se kanë një jetë me bidonë në krahë, në kërkim të ujit për të shuar etjen.
“Jemi pisllëk, çfarë të të them. Ujin e blejmë. Nuk vjen fare ujë. Dalim poshtë, bredhim për ujë.”
“Unë s’kam ujë fare, e blejmë me bot. Nuk kemi ujë në vitin 2021.”
Kanë pasur një takim në Bashkinë e Vlorës para disa ditësh, madje kanë nënshkruar edhe një peticion, dhe për këto probleme presin nga autoritetet që ta zgjidhin situatën pasi nuk mund të vazhdohet më kështu.
Thonë se pushtetarët shkojnë tek ta vetëm kur u kërkojnë votën.
U premtojnë shumë, por drejtuesit e institucioneve thonë banorët nuk kanë bërë asgjë.
Sipas bashkisë Vlorë mungesa e ujit të pijshëm në këtë bllok banimi vjen si rrjedhojë dëmtimit të tubacioneve, ndërsa shtojnë se është siguruar fondi për një projekt i cili parashikon ndërtimin e tre depove ujore të cilat do të furnizojnë lagjen Partizani, Karabash, Lirim dhe Kushtrimi në Vlorë./Oranews
