Vladimir Mara dhe Dritan Prençi, prokurorë të SPAK, kanë drejjtuar hetimet për palën shqiptare gjatë operacionit “Shpirti”, që çoi në ekzekutimin e 38 urdhër-arresteve.
Mara u shpreh se janë evidentuar disa raste të trafikimit të lëndëve narkotike mes Shqipërisë dhe Italisë, duke çuar në bllokimin e 6 ton lënde narkotike.
Prokurori i SPAK tha se janë ekzekutuar 28 fletë-arreste, ndërkohë që operacioni u shtri në Shqipëri, Itali dhe Malin e Zi.
Një element shumë i rëndësishëm që ndihmoi hetimin, sipas prokurorit Mara, ishin 4 të penduarit e drejtësisë.
“Katër bashkëpunëtorët e drejtësisë kishin një rol të rëndësishëm në grupet kriminale. Së pari është dokumentuar i gjithë rrjeti që nga kultivimi, magazinimi, dhe më pas trafikimi i lëndës narkotike drejt Italisë. Janë sekuestruar të gjitha pasuritë, që janë vënë si rezultat i aktiviteteve kriminale. E ndajmë në dy momente: në këtë hetim janë evidentuar edhe zyrtarë të lartë të përfshirë drejtëpërdrejtë në krimin e organizuar, si dhe mbështetës apo përfitues nga krimi i organizuar. Këta zyrtarë duke shpërdoruar detyrën kanë qenë të përfshirë drejtpërdrejtë në trafikimin e drogës”, tha prokurori Mara.
Sipas tij, pasuritë janë kryesisht në Vlorë, Kavajë dhe Tiranë.
“Janë 11 pasuri të paluajtshme, që nga restorante, hotele, supermarkete, troje ndërtimi, janë sekuestruar 4 shoqëri tregtare, dhe disa pasuri të tjera, që kapin një vlerë 3 mln euro.
Këto pasuri janë direkt të vëna si rezultat i aktiviteteit kriminal”, tha Mara.
Sipas tij, ky ishte një hetim shumë i mirë, i ndjekur me metoda speciale të hetimit. Mara tha se janë evidentuar dy episode të tjera të trafikut dhe për njërin prej tyre është dokumentuar edhe veprimtaria e 4 grupeve kriminale që bashkëpunonim me grupe të tjera kriminale të shtrira në Itali.
