Partizani ka afruar deri më tani 7 futbollistë në skuadër. Musta, Marku, Shehi, Paterni, Rrapaj, Gligorov dhe Damçevski janë emrat që u janë bashkuar “demave” deri më tani. Paterni dhe Damçevski pritet të zyrtarizohen shumë shpejt, por duket se përforcimet nuk do të mbarojnë këtu.
Përveçse kërkojnë medoemos dy lojtarë që të përforcojnë sulmin, drejtuesit e “demave” janë në bisedime dhe me tre futbollistë të tjerë. Bekim Dida, Andi Hadroj dhe Shqiprim Taipi janë emrat e përmendur, por bisedimet për momentin kanë ngecur…
Për sa i përket Andi Hadroj, mbrojtësi 22-vjeçar ka kontratë me Bylisin deri në janar dhe pikërisht kjo gjë, është bërë pengesë për bisedimet mes tij dhe klubit të kuq. Bylisi kërkon para për transferimin e 22-vjeçarit, por duke parë marrëdhëniet e mira mes presidentit Demi dhe Kapllanaj, pritet të gjendet një zgjidhje. Vetë Hadroj preferon të kalojë te Partizani, duke e konsideruar si hapin e duhur të karrierës.
Sa i takon qendërmbrojtësit të Korabit, Dida situata është komplikuar pas afrimit të Dajan Shehit. Te Partizani synojnë që ta bindin lojtarin të firmosë me një pagë më të ulët, por kjo gjë nuk është pranuar nga menaxheri dhe futbollisti. Dida ka disa oferta në tavolinë për momentin, mes tyre dhe dy klube të tjera të Superiores që e duan shtatlartin në skuadrat e tyre.
Ndërkohë për mesfushorin 24-vjeçar, Taipi bisedimet kanë ngecur për shkak të mosprezencës së lojtarit në Tiranë. Aktualisht, ish-lojtari i Skënderbeut nuk ndodhet në kryeqytet dhe kjo është arsyeja pse bisedimet nuk kanë vazhduar. Taipi bëri ndeshje shumë të mira me Skënderbeun sezonin e shkuar, por vendosi ta mbyllë bashkëpunimin me klubin korçar, në kërkim të një aventure të re. Partizani menjëherë është interesuar për firmën e tij dhe në të ardhmen, pritet të rinisin sërish bisedimet mes palëve./Panoramasport
