Spanja është gjysmëfinalistja e parë e Euro 2020. Në “Gazprom Arena” të Shën Petërsburgut u luajt çerekfinalja e parë Zvicër-Spanjë e cila u vendos më shumë nga episodet dhe që kualifikoi pikërisht skuadrën e drejtuar nga Luis Enrique pas gjuajtjes së penalltive.
Ndeshja ishte e qetë dhe të dyja skuadrat po studionin njëra-tjetrën por në minutën e 8′ menjëherë kalon në avantazh “La Roja” me një autogol të Zakarias i cili devijoi një gjuajtje të Jordi Alba.
Menjëherë sfida bëhet malore për helvetët të cilët marrin edhe një goditje të dytë kur Embolo lë fushën në minutën e 23′ ndërsa Spanja kontrollon lojën.
Përpjekjet e Zvicrës janë kryesisht nga krahët por asgjë konkrete nuk ndodh në pjesën e parë.
Pjesa e dytë e ndeshjes nis më mirë për Zvicrën që shton presionin për të gjetur barazimin dhe këtë e arrin në minutën e 68′. Një gabim mes lojtarëve të Spanjës i jep shansin Xherdan Shaqirit me një gjuajtje ne zonë të barazojë rezultatin.
Shaqiri me shokë marrin zemër për të bërë më shumë e nga ana tjetër marrin një goditje tjetër kur Freuler bën një ndërhyrje të gabuar ndaj Moratës dhe del me të kuq.
Emocionet janë të mëdha dhe ekipet do të luajnë shtesat e dyta radhazi pasi 90 minuta lojë u mbyllën 1-1.
Ashtu siç pritej, shtesa është një dominim i Spanjës ndërsa portieri Sommer është heroi i mbrëmjes duke shpëtuar skuadrën nga të paktën 3 gola të sigurtë të Spanjës.
Skuadrat shkojnë në lotarinë e penalltive ku pavarësisht Sommer, Spanja fitoi 3-2 me penallti duke prerë biletën për në gjysmëfinale.
