Detaje të reja kanë dalë nga vdekja e familjes Gushi në Fier disa ditë më parë.
Në një intervistë televizive, shefi i Sigurisë Rrugore në Policinë e Shtetit, Skënder Ismaili, foli për një makinë të tretë, një AUDI Q7, e cila edhe ajo ishte duke ecur me shpejtësi skëterrë, është parakaluar nga Madani, i cili më pas ka goditur nga mbrapa mjetin që po udhëtonte familja Gushi.
Ismaili thotë se 165 km në orë ishte shpejtësia mesatare e Igli Madanit nga rrethrrotullimi i Lushnjës deri në vendin e ngjarjes. E gjithë kjo distancë është përshkuar për 22 minuta. Gjurmët e frenimit të automjetit që shkaktoi aksidentin janë 63 metra.
49 mijë janë shkelje rrugore nga drejtuesit e mjeteve vetëm në muajin qershor, ku 4 më të shpeshtat janë parakalimet e gabuara, shpejtësia, përdorimi i telefonit apo ndikimi i alkoolit.
Shefi i Sigurisë Rrugore në Policinë e Shtetit, Skënder Ismaili bëri me dije se që nga nesër do të “hidhen” në rrugë një sërë radarësh të tjerë që do shërbejnë edhe për ato shoferë ‘hileqarë’, të cilët sipas tij pasi kalojnë postbllokun e policisë shtojnë shpejtësinë.
