Ministrja e Shtetit për Marrëdhëniet me Parlamentin, Elisa Spiropali, e bën fakt të kryer shkarkimin e Ilir Metës nga posti i Presidentit, edhe pse Gjykata Kushtetuese, ende nuk ka marrë në shqyrtim vendimin e Kuvendit për shkarkimin e tij.
Gjatë fjalës së mbajtur në Kuvend, Spiropali ka renditur si një nga sukseset e Parlamentit, që u braktis nga opozita reale, shkarkimin me 104 vota të Presidentit Ilir Meta.
“Me 104 vota çliruam institucionin e Presidentit të Republikës nga një përdhosës recidivist i Kushtetutës dhe frymëzues i konfliktit politik.
Tani kemi përpara detyrën të zhvillojmë një proces të hapur konsultimi të gjerë politik për zgjedhjen e afërt të presidentit të ri”, u shpreh Spiropali.
Duket se nga Rilindja, e cila më 25 prill mori mandatin e 3-të për të qeverisur, duke fituar 74 mandate, po prodhohen mesazhet e para të qarta, të cilat mund të konsiderohen edhe si presione ndaj Gjykatës Kushtetuese, përsa i takon vendimmarrjes së saj në lidhje me lënien në fuqi, apo rrëzimin e vendimit të Parlamentit, për shkarkimin e Metës.
