Ish shoku i skuadrës së Kylian Mbappe tek kombëtarja e Francës, Adil Rami analizoi Euro 2020 e yllit të PSG-së i cili fatkeqësisht humbi penalltinë kundër Zvicrës.
Që prej të hënës, emri i Mbappe është në qendër të mediave. Jo për ta lavdëruar, por për ta kritikuar. Për Mbappe kritikat kanë qenë mjaft të ashpra për këtë dështim të madh që solli eliminimin e kombëtares franceze, pa harruar edhe dështimet taktike të Didier Deschamps apo gjendjen e rëndë psikologjike të lojtarëve.
Por për Adil Ramin, kjo situatë vjen në kohën e duhur për Mbappe, i cili duhet të mësohet me këto lloj eksperience.
“Kam lexuar se ndoshta nuk është keq për Mbappe që humbi atë penallti. Duhet të kalojë këto eksperienca, të bjerë, të dështojë, të kritikohet, të piqet dhe të kuptojë se çfarë është futbolli. Unë jam i kënaqur ta shoh se si vuan, pasi e di që falë kësaj do t’ia dalë të fitojë Topin e Artë”, tha Rami.
Ish mbrojtësi i Milanit, kampion i Botës me Francën në 2018-ën dhe që aktualisht luan për Boavistën, foli edhe për karakterin shpesh të diskutuar të Mbappe.
“Sa për karakterin nuk më habit, pasi e kam parë edhe unë në 2018-ën. Do që të jetë më i miri dhe të bëjë si idhulli i tij, Cristiano Ronaldo, por nuk duhet të harrojmë që është akoma një djalosh 22-vjeçar dhe mund të përmirësohet. Zgjedhjet e tij nuk janë perfekte, por do të rritet”, tha mbrojtësi francez.
