Partizani është rikthyer në kryeqytet pas dy javëve fazë përgatitore në Ohër dhe “demat e kuq” menjëherë kanë nisur me punën intensive. Ditën e djeshme, seanca stërvitore u krye në stadiumin e Kamzës dhe zgjati diçka më shumë se dy orë.
Seanca startoi në orën 18:30, por pothuajse të gjithë lojtarët ishin në fushë rreth gjysmë ore më herët. Këtë periudhë kohore, e shfrytëzuan për të dhuruar spektakël me topin dhe të bisedonim me njëri-tjetrin. Në orën 18:32 skuadrës iu bashkua dhe stafi teknik. Ilir Daja, Ilir Bozhiqi dhe Artim Pollozhani mblodhën lojtarët në rreth dhe për disa minuta, patën një bisedim me njëri tjetrin.
Pas bisedës mes Dajës dhe lojtarëve, nisi si zakonisht stërvitja, me lojtarët që kryen nxehjen duke bërë disa xhiro rreth fushës. Sulmuesi Lucas Cardozo tentoi të marrë një top me vete dhe po bënte finte gjatë vrapimit, por menjëherë Pollozhani i tërheq vëmendjen dhe i kërkon ta kthejë topin. Cardozo ia pasoi topin Pollozhanit dhe vazhdoi vrapin me shokët e tij. Gjatë gjithë seancës stërvitore, ishte Pollozhani ai që qëndroi më afër futbollistëve, ndërsa Ilir Bozhiqi, ishte pranë portierëve, Alban Hoxha dhe Aldo Teqja.
Pas ushtrimeve fizike, lojtarët bënë dhe ushtrime me top, me pasime dhe goditje në kuadrat. Të kuqtë do të stërviten gjatë gjithë javës në stadiumin e Kamzës dhe arsyeja është për shkak të fushës. Stadiumi i Kamzës ka bar natyral dhe duke parë që sfida e parë kundër Sfintul do të luhet në “Elbasan Arena”, te Partizani duan të jenë sa më të përgatitur dhe sa më të ambientuar.
