Gjykata Kushtetues ka pranuar kërkesën e Bindjes Demokratike dhe Lëvizjes Demokratike Shqiptare për shfuqizuar nenin që i shpërndan mandatet e deputetëve sipas herësit.
Kërkesa për shfuqizimin e pikës 3 të nenit 163 të Kodit Zgjedhor është pranuar pjesërisht si e papajtueshme me Kushtetutën.
Pas vendimit të Kushtetueses, duket se zgjedhjet e 25 prillit janë zhvilluar me një ligj antikushtetues. Por ligji nuk ka fuqi prapavepruese dhe do të zbatohet për zgjedhjet e ardhshme. Më konkretisht ky nen të cilin Kushtetuesja e rrëzoi ka të bëjë me listat e hapura të kandidatëve për deputet, ndërkohë që ajo që u aplikua në zgjedhjet e fundit u bazua te thyerja e herësit.
Vendimi përfundimtar do të shpallet i arsyetuar brenda afateve ligjore të parashikuara nga ligji.
Vendimi i pjesshëm:
Gjykata Kushtetuese e Republikës së Shqipërisë mori në shqyrtim në seancën plenare publike të datës 09.06.2021 çështjen me kërkuese partinë ‘Bindja Demokratike’ dhe partinë ‘Lëvizja Demokratike Shqiptare’, me objekt shfuqizimin e nenit 163 të ligjit nr. 10019, datë 29.12.2008 ‘Kodi Zgjedhor i Republikës së Shqipërisë’, të ndryshuar me nenin 21 të ligjit nr. 118/2020, si i papajtueshëm me Kushtetutën e Republikës së Shqipërisë.
Në përfundim të shqyrtimit, Gjykata Kushtetuese
VENDOSI:
– Pranimin pjesërisht të kërkesës.
– Shfuqizimin e pikës 3 të nenit 163 të Kodit Zgjedhor si të papajtueshëm me Kushtetutën.
Vendimi përfundimtar do të shpallet i arsyetuar brenda afateve ligjore të parashikuara nga ligji nr. 8577, datë 10.02.2000 ‘Për organizimin dhe funksionimin e Gjykatës Kushtetuese të Republikës së Shqipërisë’, i ndryshuar.