Një prokuror është arrestuar këtë të Mërkurë, nën akuzën e korrupsionit. Në pranga është vënë prokurori nga Kavaja, Edmond Karriqi, i cili aktualisht e ushtron detyrën në organin e akuzës në Kukës.
Po ashtu, në pranga për akuzën e korrupsionit u vu edhe Isuf Gega, me detyrë sekretar në prokurorinë e Kavajës.
Edmond Karriqi është ndaluar te shëtitorja në Kavajë nga ana e uniformave blu, ndërsa ka qenë në shoqërinë e shoferit të tij. Ky i fundit është shoqëruar po ashtu nga policia.
Mësohet se nga ana e efektivëve është ushtruar një kontroll në banesën e prokurorit.
Ndaj tij, Gjykata e Posaçme ka vendosur masën e arrestit me burg në mungesë, me kërkesë të SPAK, që u ekzekutua nga policia këtë të Mërkurë. Gjykata po ashtu ka miratuar kërkesën e Prokurorisë së Posaçme për ushtrimin e kontrollit në banesë.
Arrest me burg u vendos dhe ndaj Isuf Gegës dhe dy personave të tjerë D.D. dhe E.B.. Dy të fundit janë në kërkim policor.
Referuar hetimeve, rezulton se Kariqi ka kërkuar dhe ka marrë përfitime monetare për të favorizuar persona në hetim nga prokuroria e Kukësit. Burime nga grupi hetimor bënë me dije se ndaj Karriqit ka përgjime që provojnë fajësinë ndaj tij. Sipas të njëjtave burime, prokuroria ra në gjurmët e tij teksa po hetonte një dosje “droge”. Pas kësaj, ai është mbajtur nën vëzhgim nga Prokuroria e Posaçme.
Edmond Karriqi është Drejtuesi i Komanduar nga KLP në krye të prokurorisë së Kukësit, ndërsa emërimin e tij e ka si prokuror në prokurorinë e Lushnjës.
