Policia në Kuvajt ka arrestuar një banor egjiptian pasi postoi një video në internet ku ankohej për temperaturat e larta dhe stuhitë e pluhurit. Vendi këto kohë ishte duke u përballur me temperatura tepër të larta që arrinin deri në 50 gradë celsius.
Ministria e Brendshme e Kuvajtit tha se burri u arrestua dhe pa kaluar shumë kohë ai u deportuar për në vendin e tij të lindjes. Në një video në rrjetin social, egjiptiani shprehet se është brenda një stuhie pluhuri dhe se nuk mund të shohë asgjë para tij.
Unë jam brenda një stuhie pluhuri tani dhe nuk mund të shoh asgjë para meje. Bukur, Kuvajt, mirë.
Videoja e tij u publikua në rrjetet sociale dhe u bë menjëherë virale në internet duke mbledhur mijëra komente nga më të ndryshmet. Ky arrestim nxjerr në pah kufizimet e shprehjes në këtë vend dhe për këtë shumë persona reaguan ashpër.
