Në një kohë kur Gjykata Kushtetuese ende nuk ka dhënë një vendim lidhur me Teatrin Kombëtar, i cili u shemb më 17 maj 2020, Kryebashkiaku Erion Veliaj ka publikuar në rrjetet sociale foto nga projekti i godinës së re, por edhe detaje se si do të jetë ajo.
Qeveria Rama u nxitua të miratojë projektin për Teatrin e ri Kombëtar, pa pritur që Kushtetuesja të shprehet, edhe pse gjykimi ka nisur dhe palët kanë shprehur qëndrimet e tyre. Kushtetuesja pritet të japë vendimin lidhur me çështjen, por në anën tjetër Rama ka avancuar procedurat për godinën e re.
“KKT e Qeverisë Shqiptare sapo miratoi lejen për Teatrin e Ri Kombëtar të Bashkia Tiranë nga Bjarke Ingels (BIG) 👍🎭
📌 AUDITORIUM 635 vende
📌 BLACK BOX i vogël 150 vende
📌 BLACK BOX i madh 350 vende
📌 AUDITORIUM në taracë 500 vende
🅿️ 2 kate parkim
0️⃣ kulla në territor
Ecim para!”, shkruan Veliaj në rrjetin social.
Ndaj arkitektit danez, projekti i të cilit është shpallur fitues nga KKT, Partia Demokratike ka depozituar padinë në Prokurorinë e Përgjithshme, duke e akuzuar arkitektin danez për 3 vepra penale : “Korrupsioni pasiv në sektorin privat”; “Dhënia e ndihmës për ndërtim të paligjshëm”; dhe “Ushtrimi i ndikimit të paligjshëm ndaj personave që ushtrojnë funksione publike”.
Padinë ndaj arkitejktit danez e kishte paralajmëruar edhe kryetari i opozitës, Lulzim Basha në një dalje për mediat pak ditë më parë.
Mes të tjerave, në padi, theksohet fakti se për t’i hapur rrugë projektit të Bjarke Ingels, të porositur nga Kryeministri dhe Kryetari i Bashkisë që në 2016-ën, pa u bazuar në asnjë procedurë ligjore. Për këtë padi, Partia Demokratike ka njoftuar edhe Ministrinë e Drejtësisë së Danimarkës, duke qenë se studio arikitekturore e Bjarke Ingels, “BIG-BJARKE INGELS GROUP”, ka qendrën ne Kopenhagen të Danimarkës.
