Rreth 24 orë pas vrasjes së katër personave në Velipojë për çështjen e menaxhimit të hapësirës së plazhit, një tjetër incident është regjistruar me të njëjtin kontekst, kësaj here në jug të vendit.
Rreth 60 shezlongë janë djegur gjatë natës së të hënës në zonën e Drimadhes në Himarë.
“Më datë 28.06.2021, rreth orës 01:00, në Drimadhes, Dhërmi, ka rënë zjarr dhe janë djegur rreth 60 shezlongë në pronësi të shtetasit B. D.”, thuhet në njoftimin shkurt të Policisë së Vlorës, duke shtuar se grupi hetimor po punon për zbardhjen e rrethanave të ngjarjes.
Burimet bëjnë me dije se shezonglët e djegur plotësisht janë në pronësi të shtetasit, Bilbil Domi, i cili kishte vetëm 24 orë që kishte marrë lejen e shfrytëzimit të plazhit. Pas marrjes në pyetje nga Policia, 55-vjeçari ka deklaruar se nuk ka pasur konflikte dhe se nuk i di autorët, duke pranuar se ka pasur pakënaqësi nga bizneset përreth. Ngjarja dyshohet se ka ndodhur për shkak të konkurrencës.
Për zjarrvënien ende nuk ka asnjë person të shoqëruar. Ngjarja vjen pas masakrës në Velipojë, ku mbetën të vdekur katër persona dhe u plagosën dy të tjerë pas përplasjes me armë zjarri, duke shkaktuar jo vetëm tragjedi për dy familjet e përfshirë, por edhe panik te pushuesit e shumtë që vizitojnë bregdetin në këto ditë të nxehta të fundmuajit qershor.
Motivi është i njëjtë: ndryshimi i menaxhimit të hapësirave publike të plazheve. Vitet e shkuara, lejet për këto hapësira i jepnin bashkitë përkatëse që shtrihen në vijën bregdetare, ndërsa këtë vit kompetencat i kanë kaluar Agjencisë Kombëtare të Bregdetit.
Reagimi
Përfaqësuesja ligjore e kompanisë që menaxhon hapësirën publike të plazhit ku u dogjën shezlongët, Artemis Kito, tha se nuk ka pasur konflikt të mëparshëm, duke theksuar se pret zbardhjen e ngjarjes nga ana e Policisë. Ajo tha se aktiviteti nuk kishte nisur akoma dhe se të gjithë shezlongët u gjetën të djegur pas lajmërimit të Policisë nga ana e banorëve përreth.
“Ne jemi pajisur me stacionet e plazhi në Drimadhes, jemi aprovuar më 8.6.2021 dhe për pagesën e taksave kemi shkuar në Bashkinë e Himarës. Mbrëmjen e djeshme kemi marrë telefonatë nga banorët që panë zjarr dhe tym pa ditur se çfarë po ndodh. Erdhëm në vend bashkë me Policinë dhe gjithë shezlongët ishin djegur. Nuk e kishim nisur akoma aktivitetin sepse në 25.6.2021 kemi marrë njoftim nga Agjencia Kombëtare e Bregdetit dhe prisnim piketimet nga Bashkia e Himarës. Nuk kemi pasur konflikt me individ tjetër. Shkak konkurrenca? Nuk mund të mendoj asnjëri në këtë moment, mund të ketë qenë edhe aksidentale. Presim të zbardhet”, tha ajo.
