Mbrëmjen e djeshme Franca humbi përballë Zvicrës, ndërsa koha e rregullt përfundoi 3-3. Pas goditjes së 11-metërshave, zviceranët arritën të kualifikoheshin me rezultatin 5-4.
Përgjegjësi të madhe në këtë disfatë të rëndë mban edhe Kylian Mbappe, i cili humbi penalltinë, që i dha kualifikimin Zvicrës.
Direkt pas ndeshjes ai la fushën i zhgënjyer dhe nuk foli për asnjë medie. Gjithsesi nuk vendosi të qëndrojë në heshtje, por i tha fjalët e tij pas ndeshjes në një postim në Twitter. U kërkon falje të gjithëve dhe shprehet se do kthehet me i fortë.
Postimi i Mbappe
“Shumë e vështirë për të kthyer faqen. Trishtimi është i pamsë pas këtij eliminimi, nuk mundëm ta arrinim qëllimin tonë. Më vjen shumë keq për atë penallti. Doja të ndihmoja ekipin, por dështova. Do e kem shumë të vështirë të fle gjumë, por fatkeqësisht këto janë risqet e këtij sporti, të cilin e dua shumë.
E di që ju (drejtuar tifozëve) jeni të zhgënjyer, gjithsesi doja t’ju falënderoja për mbështetjen tuaj dhe që gjithmonë keni besuar te ne. Gjëja më e rëndësishme tani do jetë të ngrihem më i fortë për vitet e ardhshme. Urime dhe fat të mbarë Zvicrës!”
