Drejtuesja e Prokurorisë së Tiranës, Elisabeta Imeraj, ka reaguar menjëherë, pasi Operacioni Ndërkombëtar i Monitorimit (ONM) njoftoi se ka bërë një rekomandim shtesë për ankimimin e vendimit të konfirmimit të saj në detyrë.
Në një prononcim për “Boldnews.al”, Imeraj shprehet se nuk ka asnjë dijeni për aktet shtesë që vëzhguesit e ONM-së i kanë përcjellë Komisionerit Publik dhe se nuk ka asnjë lidhje me krimin e organizuar dhe jo të organizuar.
Pasditen e kësaj të Enjte, vëzhguesit ndërkombëtarë njoftuan se i kanë dërguar Komisionerit Publik një shtesë rekomandimi, në të cilin theksojnë se “jo vetëm që gjetja e lidhjes mes subjektit të rivlerësimit dhe njrëzve të dënuar por edhe qartësimi nëse personat e dënuar janë me të vërtetë ish-bashkëshorti dhe ish-kuinati, ka rëndësi të madhe për një përqasje më të mirë në vlerësimin e subjektit”.
Pas publikimit të këtij njoftimi, Kryeprokurorja e Tiranës deklaron se “aktet shtesë të Operacionit Ndërkombëtar të Monitorimit nuk më janë vënë në dispozicion për thuajse 3 vjet”.
Imeraj deklaron se “do të paraqesë një kërkesë për t’u njohur me këto akte dhe me pretendimet e ngritura”.
Prokurorja deklaron se vijon të jetë mbështetëse e procesit të drejtë ligjor dhe pret që edhe ndaj saj të zhvillohet një proces i tillë, brenda standarteve ligjore.
Megjithatë, për drejtuesen e Prokurorisë së Tiranës, të gjithë atë që po ndodh me rastin e saj, e konsideron “të padrejtë me mënyrën se si po veprohet”.
Elisabeta Imeraj deklaron se “nuk kam asnjë lloj lidhjeje me krimin e organizuar apo me atë të paorganizuar”.
Rasti i Imerajt u bë çështje ndërkombëtare më 22 qershor kur ambasada e Shteteve të Bashkuara në Tiranë dhe ajo e Bashkimit Evropian publikuan deklarata mbështetëse për rekomandimin për apelim të vëzhguesve.
Bordi i Operacionit Ndërkombëtar të Monitorimit me bazë në Bruksel publikoi një deklaratë më vete në emër të Bashkimit Evropian dhe Qeverisë së Shteteve të Bashkuara, ku e cilëson se rasti i Imerajt ka rëndësi “për të siguruar integritetin, pavarësinë dhe tërësinë e procesit të vetingut”.
