Në orët e para të së dielës si pasojë e një konflikti të nisur për shezlongjet e plazhit, pati 4 viktima dhe 2 të plagosur.
Fillimisht konflikti nisi mesditën e së shtunës, kur nga familja Gocaj, e cila ka një hotel në zonën e Velipojës, u vendosën shezlongjet. Në anën tjetër familja Ferracaku, e cila edhe kjo ka një hotel vetëm 50 metra më larg, duket se ka kundërshtuar zënien e hapësirës.
Konflikti i nisur në mesditën e së shtunës ka vijuar, derisa në orët e para të së dielës, dy familjet u përfshinë në një konflikt të armatosur, duke shkaktuar 4 viktima dhe dy të plagosur.
Mes të plagosurve ishte edhe Hasan Ferracaku, të cilin Policia edhe e ka arrestuar.
“Fillimisht kemi zhvilluar një debat tek shezlonget në plazh sepse ata i kanë vendosur në vendin ku këtë vit e kemi pasur të drejtën ne pas aplikimit që kemi bërë. Pas atij debati kemi shkuar në darkë tek hoteli Gocaj për t’u sqaruar me familjen Gocaj. Jemi ulur në tavolinë për të biseduar.
Ne i kemi thënë që të gjejmë një marrëveshje, pasi ata i kishin vendosur më përpara shezllonet njëkohë që këtë vit kjo e drejtë ishte e jona në baze të aplikimeve. Ata nuk kanë pranuar duke thënë se duhet të presin derisa të përcaktohet edhe vendi i tyre. Gjatë bisedës ka nisur debati dhe gjërat janë acaruar duke bërë që të përdoren edhe armët.
Ne kemi shkuar për të folur dhe për të gjetur një zgjidhje për shezllonet, por situata u acarua dhe pas krismave të armëve nuk e di çfarë ka ndodhur më. Di që ata kanë qëlluar ndaj vëllait dhe ne të tjerëve dhe në atë moment vëllai është vetëmbrojtur. Unë nuk kam qëlluar dhe kemi shkuar vetëm për të biseduar sepse janë njerëz që ne i kemi njohur dhe kemi pasur marrëdhënie të mira, por situata doli nga kontrolli”, ka thënë Hasan Ferracaku.
Policia tha se ka shpallur në kërkim lidhur me konfliktin që shkaktoi 4 viktima edhe Abedin Ferracaku 30-vjeç, Shyqyri Ferracaku 26-vjeç dhe Besar Ferracaku 20-vjeç, 3 djemtë e të plagosurit që u arrestua, Hasan Ferracaku.
Tre vëllezërit janë të dyshuar si bashkautorë në këtë ngjarje, për kryerjen e veprave penale “Vrasja në rrethana të tjera cilësuese, kundër dy ose më shumë personave” dhe “Prodhimi dhe mbajtja pa leje e armëve luftarake dhe municionit”, në bashkëpunim.
“Në cilësinë e provës materiale janë sekuestruar dy armë zjarri pistoleta, njëra prej të cilave u gjet në vendngjarje, ndërsa tjetra u gjet gjatë kontrollit në hotelin e familjes Gocaj. Grupi hetimor, nën drejtimin e Prokurorisë, vijon punën për zbardhjen e plotë të rrethanave të ngjarjes, identifikimin dhe kapjen e personave të tjerë të përfshirë në konfliktin me armë. Materialet procedurale do t’i kalojnë Prokurorisë së Rrethit Gjyqësor Shkodër, për veprime të mëtejshme”, tha policia.
