Pak orë pasi, ministri i Brendshëm, Bledi Çuçi tha se prokurorët dhe gjykatësit lirojnë persona me rrezikshmëri erdhi edhe reagimi i ILD-së. Lidhur me pretendimin e Çuçit për 3 raste të magjistratëve, ILD konstaton mosrespektim të pavarësisë së tyre dhe institucioneve të pavarura të drejtësisë. Kjo sipas Inspektoratit të Lartë të Drejtësisë po kthehet në traditë.
“ILD konstaton me keqardhje se mosrespektimi i pavarësisë së magjistratëve në ushtrimin e detyrës së tyre, por edhe të institucioneve të pavarura të drejtësisë po kthehet në traditë, sa herë që publikisht kërkohet marrja e përgjegjësive”, thuhet në një reagim.
ILD thotë se e ka prioritet të punës së saj shqyrtimin dhe vlerësimin me seriozitet të të gjitha “pretendimeve të paraqitura nga persona fizikë ose juridikë lidhur me veprimet, mosveprimet ose shkeljet e magjistratit brenda apo jashtë funksionit të tij, në ekuilibër midis parimeve të interesit publik për administrimin e drejtësisë dhe ndarjes së pushteteve”.
“Këto parime duhet t’i respektojë çdo institucion në vend, si standarde dhe vlera të një shoqërie demokratike dhe të garantimit të shtetit të së drejtës. Vendimet e magjistratëve nuk mund të bëhen objekt rishikimi apo diskutimi, nëpërmjet deklaratave publike jashtë sistemit të ankimit gjyqësor”, thuhet në deklaratë.
Zyra e Inspektorit të Lartë të Drejtësisë thotë se është e hapur për të pranuar nga çdo institucion ankesa në lidhje me sjelljen e magjistratëve.
“Në rast të konstatimit të sjelljeve të cilat përbëjnë përgjegjësi disiplinore, Inspektori i Lartë i Drejtësisë për sa ka vepruar deri më tani, në rastet kur ka konstatuar sjellje apo akte të cilat përbëjnë shkelje disiplinore ka propozuar marrjen e masave të nevojshme disiplinore”, mbyllet reagimi.
