Ministri i Brendshëm, Bledi Çuçi, u shfaq sot i bindur se do jetë pjesë e qeverisë së re.
Pavarësisht ngjarjeve të rënda kriminale, për të cilat Çuçi tha se nuk ka përgjegjësi Policia, ministri la të kuptohet se do të jetë në kabinetin e Ramës edhe pas shtatorit.
“Jo, se po u hap radha, një ti, një ai. Do kemi raste edhe pas shtatorit meqë e ke merak”, tha Çuçi. Në shtator pritet që Parlamenti i dalë nga zgjedhjet e 25 prillit të miratojë Qeverinë e re, ndërsa socialistët kanë 74 mandatet e tyre dhe 3 mandate nga PSD e Tom Doshit.
Nuk dihet nëse Çuçi ka marrë garanci nga Kryeministri Edi Rama për të qenë sërisht ministër, apo ai ka dashur të provokojë me deklaratën e tij.
Në fund të muajit gusht, Asamblea e PS-së pritet të njihet me propozimet e Kryeministrit Edi Rama lidhur me Qeverinë e re, por një ditë më parë, kreu i grupit parlamentar socialist, Taulant Balla, foli për figura të reja në mandatin e tretë qeverisës së socialistëve.
